Viefkop

De ôôle Putte

Redactie

Redacteur

De ôôle Putte

Ie riedt langs die zààndwoestijn biej Boer Biet. Doar steet e, as ne zooltpilaare, in het kaale zàànd. Zôl der dan toch ééne stiekem achterumme hemm’n ekekk’n. Het gôônst van de gerucht’n. Hoe ôôld is de putte? Hef Karel de Vijfde doar ziene peerde wat te drink’n egèèm’n of is e uut de tied det Napoleon hier de baas was. De tied zal ’t ôôns leer’n, as de putte ziene geheim’n pries gif. Sommigen sloat hèèmoa duur, zie dèènkt det er gooldstukk’n of zelfs ne bullebak in kan ligg’n. Ne goeie road, neet stillekes goan kiek’n, met ne bullebak köj’ ‘t nôôit wèèt’n. Zeej ’t à vuur oe. Keizer Karel trek duur Hoolt’n. De lèu blieft stief van schrik binn’n de pöste. Astebleef loat ze vedan goan, wiej hebt de leste tied à genog naarighèid ehad. Biej den ôôld’n harbarg tèèngnoaver de karke heult de stoet stille. As det mà good geet. Noa een uur is het grôôt feest. En stuk of wat van die meuige hebt de weg evund’n noar de putte. De bierpull’n stoat neuist mekaarop het wàànkele räänneke. Nee, zelf stoat ze ôk neet meer stèèvig op de beene. Doar valt de èèrste pulle de deepte in. Gelukkig trekt de barbaar’n veerder. De kastelein mist allèène de wörste in viem’n en een stuk of wat bierpull’n. Die ligt vuurgood op de boadem van de putte. Nôh ja, vuurgood? Noe, zô völle joar’n later zal de putte onderzoch word’n en zöw we der achter kômm’n, wat de geschiedenis warkelijk is ewes. Jammer det ôônz’n ôôld’n mèister der neet meer is. Hij had er vaste wal een mèuier verhaal van emaakt. Mèister Brouwer, de man van het Sallandlied, mar ôk de man diet in 1949 hoofd van de oop’nbaare schoole wörd’n. Det zôl e bliem’n tut 1977. Hij begint met acht klass’n en acht leraar’n. Vuur um een makkie. Op ziene schoole in Erica gif e met twei leraar’n les an vief klass’n. Klass’n van vèèrtig leerling’n bint in Hoolt’n gen uutzundering. De schoole greuit uut zien jäske en in 1965 kump de Kolschoole der biej. In 1974 nog ne ofsplitsing met de schoole in de Haar. In 1977 mèimp hij ofschèid van het ôônderwies. Hij is ter grèuts op det e an de weege hef estoane van het vervolg ôônderwies in Hoolt’n. Det geet àmoa neet zo makkelijk. Hààndtèèkening’n mônn’n der kômm’n. In de hèele umgèèving is ter geen oop’nbaar middelbaar ôônderwies. Met 65 hààndtèèkening’n kump ’t in de Road. As ’t op stemm’n ankump, wördt het ’t an enömm’n, met ééne stemme verschil. Doar is één Roadslid zeek. Gelukkig mà, ààns haw we noe gen “Waardenborch” ehad. De Ulo-schoole begint in het èèrste joar met viem’ndartig leerling’n en noe meer dan duuzend. Zô zeej’ mà. Wat zal der in de putte zitt’n?