Het seizoen zit er op
Redactie
Redacteur

Hoolt’n is kampioen. Volgend joar in de dèirde klasse. Wiej nemt oe met noar een dikke viem’nzèumtig joar trugge. An het woord is Jan Kalfsterman, de latere directeur van de ENKCO. Nèèngtienhonderd en nèèng’n vèèrtig. Hoolt’n kan vuur de èèrste kèèr promovèèr’n noar de grôôte KNVB. De held’n van toen; Fritz Russ, as ne jong’n tijger steet det klèine keerltje in de goal, mà wat een sprongkrach, links back Herman Frààns’n en vuur de corners Henk Ôôlbekkink, de schouwmaaker. Veerder Jan Kalfsterman, de dribbelkoning en iezer’n Rinus den Heijer. HVC, vuur de èèrste kèèr kon ze promovèèr’n, jammer het is toen neet elukt. Voetbal, al vanof 1921 wördt er in het Sportdal tèèg’n het lèèr’n monster eschupt. HVC, nog in rôôd zwart, gestèèpte shirts. Het is behelp’n, de mèèste uutwedstried’n op de fietse, met de tasse ôônder de snelbinders. Môs ie een betje veerder weg , dan kwam Ab Muller met nen ôôle OAD busse uut de garage. Wà ne parapluu metnemm’n, want het dak van de busse was zô lek as ne zèèjje. In de busse was ’t altied onmeunig gezellig, vuural op de trugweg, as Willem Beijers de ballade van de Zwarte Zigeuner begun te zing’n. Denzelfd’n Beijers vreug in 1937 à of Jan Kalfsterman met môch doon in ’t èèrste elftal. Hij was toen nog mà dartien joar. Det kon àmoa nog. Hij zôl nog tut 1957 in ‘t èèrste bliem’n spöll’n. Wiej zit noe wal is te klaag’n oaver accommodaties. In die tied één veeld. Ne kleedkamer is ter neet .Zie trekt zich an biej Hendrik Meerman op ’n hook, biej de Poorte. De tèèngstàànders möt zich ààns umme an trekk’n biej café Maats. Ne trainer verget ‘t, wà ne selectiecommissie, mà die is à bliej at ze elf man biej mekaar kriegt. Zô of en touw goat ze met mekaa ’n Barg in um conditie te krieg’n. Nee, ech neet te vergeliek’n met de tied van noe. De centrale figuur is Willem te Veele. Vuurzitter, manager en masseur. Is ter ééne geblessèèrd, dan gif e een zuurtje. Det lèèvert ‘m de eretitel op van “Zuurtjesdokter”. Het voetbal stun op een völle lèèger peil as vandaage an ’n dag, mà zie wadd’n spiekerhard. Zelf steet Jan vaake opestelt as midd’nvuur.Hij mag geerne ne bal inkopp’n. Henk Ôôlbekkink slingert ze biej ’n tweed’n poal, vuur de goal. Vaake hönge dan in ’t netje. Ie mônn’n trouwens wal oppass’n. Doar zat in die tied nog ne dikk’n leer’n veter in de balle. Àj den liek op de plette krèèg’n, kôj’ det nog daag’n zeen en veul’n. Ôk ne trap, van die voetbalkissies met iezern nèuze, blèèf vaake neet zôônder gevolg’n. Môôie tied’n, wiej kiekt uut noar het nieje seizoen met Hoolt’n in de dèirde klasse.