Oen eeg’n dialect
Redactie
Redacteur

Wie zôl der noe neet een kèèr, in zien eeg’n dialect, een gedich wil schriem’n en vuurdrèèg’n. Ik heur ’t à. Ik kômme neet van hier, dus dan heult ’t op. Nee heur, intèèng’ndeel. Het dialect is duur edrung’n tut op de bureel’n van de Stichting Kunst en Cultuur. Zie hôôlt, net as dit joar, op vieftien januari 2027 ne vuurlèèswedstried van gedicht’n in ‘t plat. Det mag Hoolt’ns wèèr, mar ôk Riessens, Grönnings, Broabàànts, of Rotterdams. Kortumme, iedereene kan met doon. Heij’ ôôit een gedich emaakt, wàj’ zelf moôi vindt, of schrief ie der eene. Ie könt ze instuur’n noar info@kc-holten.nl. Doarvuur heij’ nog de tied tut vieftien december 2026. Dus wiej’ metdoon, pakt penne en pepier, doar geet ’t hen; Ik kan riemen, ik kan dicht’n, zôônder ’t gat van ’n stool te licht’n. Mar iele könt det völle better. De ingestuurde gedicht’n wordt beoordeelt duur ne deskundige jury. De tien beste inzenders meugt eur gedich zelf vuurdrèèg’n in de theaterzaal van ôôns Kultuurhuus. Zörgt dàj’ der biej bint, het wördt onmeunig gezellig. Neuist de gedicht’n völt er ôk muziek in het dialect te belustern. Van de gedicht’n wördt een beukske emaakt. Iedereene krig zô’n beukske met um het in huus àmoa nog is wier noa te sloan. Dèènkt noe neet, det köw we neet. Goat gezellig met een köppeltje um de kachel zitt’n. Ie zölt zeen, biej ne komme zuukela en een stuk speculaas, kômt de mèuiste gedicht’n noar boam’n. Kiekt mar is noar buut’n. De bèume kaalt, de blaa verkluurt, ech met de zommer is ’t gebuurd. Het duuster wint ’t van het lech, altied wier spannend, wat die tied ôôns breg. De halve weereld steet in bràànd, duur wereldleiders, onverstàànd. Ie loat gewoon oene gedacht’n de vrieje lôôp en vuur dàj’ der arg in hebt is oen gedicht kloar. Neet bange wèèr en opstuur’n. Wat wiej’ de lèu metgèèm’n vuur het nieje joar, wat zit oe dwars. Opschriem’n in oen eeg’n moodertaal. Loat’n zeen en loat’n heur’n det het plat ech thuus heurt biej Stichting Kunst en Cultuur. Ôôndertuss’n löp oktober op zien èinne. Vuur dàj der arg in hebt steet de nieje Prins Carnaval vuur ôônze nèuze, dreks evolgt duur Sunterkloas. De tied roast vuurbiej. Disse wekke heiw we ofschèid mönn’n nemm’n van Prins Willem van Oranjeboom, ne Rotterdammer, Schout van de Duustere Stèège. As vuurzitter van de Kèègelclub en sikkretaris van de Tennis, kwam hij binn’n de Fienpreuvers. Joar’nlàànk was e hulp Sunterkloas in Hoolt’n. Doarneuis, vuurzitter van de SV Hoolt’n en in de èèrste tien joar, vuurzitter van de Keunefeest’n. De leste joar’n was het röstig rôôndum Wim Dogterom. Det e mag röst’n in vrèè. Ie zeet ’t alles kan.