Duurpakk’n en neet parkèèr’
Redactie
Redacteur

Weg parkèèrplaats’n. Zô in één kèèr gung’n de hekk’n oaver de parkèèrplaats’n an de Grôôte weg. De ôôndernemmers stunn’n der biej en kekk’n der noa. Noa de joar’nlange ellende van het grôôte gat kon dit er ôk nog wà biej. Links en rechts protest’n en waarachtig doar kwam reaktie uut de Stad. De greune parkjes an de ààndere kàante van de weg wörd’n um etèuvert in nieje parkèèrplaats’n. Hulde, kon alles mà zo rap goan. Noe is ’t netuurlijk neet zo, det er gen parkèèrplaats’n wadd’n, mà ja, dan möj’ een stuk veerder lôôp’n. Vuur de euldere lèu is det bes wà moeilijk, mar alles möt op het gemak. De auto netjes in een parkèèrvak, op noar de winkelkoare en dan rap, rap de bosschôpp’n biej mekaar hark’n, ofrekk’n en wier op huus an. Het is hoas, hoas, hoast. Det was vrogger wal ààns. Gen auto’s, de jutt’ntässe an ’t stuur en dan trapp’n ie noar de winkel. Heìnig an, vèèrtien man vuur oe en lekker met mekaa klasjenèèr’n oaver van alles en nog wat. Wacht’n tut dàj’ an de buurte wadd’n. Niks zelfbediening, alles wörd’n netjes of eweuig’n, esnèène en in e pakt. Gedeuld en perkèèr’n? Gen prebleem, de fiets’n stunn’n tèèng’n de muure an te wacht’n, tut dàj’ de suuker en de splitarwt’n in het täske konn’n doon. Hèinig an vedan. Parkèèr’n, ie maak’n der gen prebleem van. Ie môch’n de fietse biej de schoole neet in de fiets’nstalling zett’n, umdaw we mà ne kilometer van de schoole wonn’n. Gen nôôd, ie zett’n ‘m zô in de Sikk’nstroate, biej Graads vuur de duure. Het kon amoa. Ôk op ôônz’n gàànk noar het Sportdal zagge wiej gen parkèèrprebleem. Ie sprung’n van de fietse en het keuirke vund zien weg op het grös net vuur het veeld. Later zat ie ‘m netjes biej Niejndiek in ’n wal. Parkèèrprebleem’n, nôôit van eheurt. Noe köj’ de fietse oaverà netjes in de rekk’n zett’n. Bint de prebleem’n doarmet op elöst, wis en waarachtig neet. De ofgelôôp’n tied protest’n van hier tut Tokio en wat dut de regering, de narigheid parkèèr’n. Zie bint à moand’n an ‘t formèèr’n. Van armood bint ze mà begunn’n met ne minderhèid, um eur zin duur te drukk’n. Uutèindelijk hebt ze noe de prebleèm’n parkèèrt biej het Catshuus. Het geet nog moand’n duur’n en ôôndertuss’n löp de naarighèid ôôns oaver de schoone. Half Nederlànd kôch in Duutslàànd. Ieder joar kump ter ne stad as Zutphen binn’n, die we àmoa möt ôônderhôôld’n. De boer’n schreeuwt moord en bràànd. Het is neet vol te hôôld’n, anpakk’n. Kiekt noar ôônze gemeente, as de nôôd an de man is, kan alles in één kèèr hèèl rap. Duurpakk’n, rap en neet parkèèr’n.